Trátase dun dos templos mais antigos de Ribadeo, construído no século XII por Fernando II sobre tramos das antigas murallas ribadenses. Está situada sobre un promontorio dende o que se divisa a entrada da ría e no que xa en tempos medievais se colocaban fachos para guiar de noite aos navegantes.

Deste miradoiro, dende o que se  divisa o porto de Porcillán e que nos ofrece unhas estupendas vistas da zona, toma o seu nome de Atalaia. A carón do templo atópanse dous canóns, que son indicadores da súa orixe coma baluarte de defensa da vila.


Nesta capela, consagrada á Santísima Trindade,  reuníanse os gremios e celebrábanse os consellos abertos.

A capela sufriu varias reformas no transcurso do tempo.

Actualmente conserva a porta principal gótica do século XIV, con decoración en zig-zag e dúas cabezas humanas nos extremos. Consta de nave, arco triunfal e presbiterio.

No seu interior contén e tres retablos, entre os que destaca o seu retablo barroco, con tallas de variada cronoloxía entre as que se atopa a imaxe titular da Santísima Trindade e unha pía de auga montada sobre unha columna gótica.

Sobre a porta principal pode verse un escudo en pedra de Ribadeo e unha espadana dun só van.